6.9.11

Yfirstrikaðir staðir 14



Stjórnarskrá Ælendinga

Allir eru asnar nema Ælendingar 
Allt er öðrum að kenna. 
Enginn er klókari, betri eða vitrari en Ælendingur. 
Ælendingur má gera og segja það sem honum sýnist þegar honum sýnist eins og honum sýnist. 
Hver sá er gerir eitthvað annað en það sem Ælendingar vilja, eða gerir hlutina öðruvísi en Ælendingar kjósa, hefur gert sig seka(n) um refsiverða háttsemi og gildir þá einu hvort viðkomandi hafði hugmynd um vilja Ælendinga eður ei. 
Þeim sem gengur vel og líður vel hlýtur að hafa stolið einhverju frá Ælendingi og skal refsað í samræmi við það. 
Hver sá sem er stærri og meiri en Ælendingur á einhvern hátt skal umsvifa- og undantekningalaust smækkaður með öllum ráðum. 
Öllum sem á einhvern hátt eru frábrugðnir Ælendingum í útliti og/eða hugsunarhætti skal vísað úr landi án tafar. 
Ælendingur ákveður hvað er satt. 
Þegar Ælendingur segir að hann sé ósýnilegur þá er hann það. 
Ælendingur ræður alltaf, sama hvað hver segir og hversu margir kunna að segja það, enda kemur það málinu ekkert við. 
Ælendingur er eyja og hefur þar af leiðandi ekki áhuga á öðrum en sjálfum sér. 
Ælendingar fara alltaf stystu leiðina. 
Ælendingur getur aldrei haft það svo gott að hann megi ekki kvarta. 
Þeir sem ekki eru sáttir við stjórnarskrá Ælands eru ekki Ælendingar og ber því að fara eftir þessari löggjöf og virða hana í einu og öllu. 
Ælendingum er hins vegar frjálst að túlka hana eftir eigin höfði. 
Nei, það eru engar mótsagnir í 15. grein. Asni.

1 comment:

  1. 1. Teiknaðu mynd eða kort af Ælandi. Hafðu í huga þau samskipti sem fygja svona reglum. Er líklegt að menn búi í fjölbýlishúsum, eða býr hver útaffyrir sig, jafnvel bakvið háa veggi? Hugleiddu smáatriðin.

    2. Stundum er erfitt að vera unglingur. Skrifaðu sögu eða ljóð um það erfiðasta sem unglingar þurfa að ganga í gegnum.

    3. Rökfærsla: Mótsagnir eru það þegar maður segir eitt á einum stað og eitthvað annað á öðrum, sem stangast fullkomlega á við það fyrra. Er það ekki allt í lagi? Færðu rök fyrir máli þínu og taktu afstöðu.

    4. Tónlist: Leitaðu að Herði Torfa inni á gogoyoko.com. Þar getur þú heyrt mörg af lögunum hans. Hlustaðu á lög af ýmsum plötum og veldu síðan þrjú lög sem þér finnst best. Skrifaðu hvaða lög þú valdir og hvers vegna þau.

    5. Hópverkefni: Setjist saman á fund (5 eða fleiri) og semjið „stjórnarskrá“ fyrir Úllónolló. Hvað er mikilvægast? Ekki stela reglunum úr Hálsaskógi.

    6. Annað. Hvað viltu gera?

    ReplyDelete